Citizenship Bill vangin AGP minister pathum bang

Assam-a Bharatiya Janata Party (BJP) thu­rualpui Asom Gana Pa­rishad party chu Thawhṭanni-a NDA aṭangin a inhnuhdawh hnuah Nilaini khan an minister pathum-te chuan Assam Cabinet-ah banna an thehlut ve leh.

AGP hian Thawhṭanni khan Citizenship Amendment Bill an pawm ve theih loh vangin BJP kaihhruai ṭanrual pawl aṭanga an inhnuhdawh thu an puang a ni.

Assam Agriculture Mi­nister Atul Bora, Water Resources Minister Keshav Mahanta leh Food and Civil Supplies Minister Phanibhushan Choudhury-te chuan Nilaini khan Assam state khawpui Guwahati-a state secretariat-ah Chief Minister hmuin banna an thehlut.

Nilaini vek hian mi­nister pathum-ten banna an thehluh hma hian AGP hian Guwahati-a an headquarters-ah party meeting an nei a, an ban tur chungchang hi an sawi bakah hma an lak chhunzawm zel dan tur an sawi a ni.

Party President Atul Bora chuan bill dodalna tur chungchanga an party kal zel dan tur chu an la puang chhuak dawn tih a sawi.

Assam Assembly-ah hian seat 126 awmin AGP hian MLA 14 an nei a, mi pathum in banna an thehluh hian nghawng a la nei lian vak dawn lo nia ngaih a ni thung. BJP hian member 61 neiih BPF-ten an la thawhpui bawk a, BPF-te hian MLA 12 an nei a ni.

Hetihlai hian eptu pawl Congress party leh  All Indian United Demo­cratic Front (AIUDF)-te chuan MLA 25 leh 13 an nei ve bawk.