CAB duh lohna lantirin Manipur-ah Darkar 18 awh nawrh huaihawt

Central-a Bharatiya Janata Pary (BJP) kaihhruai National Democratic Alliance (NDA) sor­karin nimin aṭanga ṭan, Parliament thlasik session chhungin Citi­zenship (Amendment) Bill (CAB) pass ngei a tum nia sawi chu duh loin, Manipur-ah nimin zing aṭang khan darkar 18 awh tur nawrh, total bandh huaihawt a ni. 

CAB duh lohna lantira total bandh huaihawttu hi Manipur Peo­ple Against Citizenship (Amend­ment) Bill 2016 (MANPAC) a ni. North East Forum for Indigenous Peoples (NEFIP) hminga hmarchhak state hrang hranga CAB dodalna lantirna buatsaih chu Manipur-a hian MANPAC hian a kalpui a ni. 

NEFIP president Ninthouja Lancha chuan CAB duh lohna hi kawng hrang hrangin lantir chhunzawm zel an tum tih a sawi. Sorkar laipui chuan hmarchhak mipuite he bill hi an duh lo a ni tih pawh chiang taka a hriat  hnuah pass luih an tum a nih chuan NEFIP chu a ngawi mai mai dawn a lo a ni, a ti. 

Hmarchhak state hrang hrang Governor-te kaltlanga NEFIP hnuaia civil society organisation 250 chuangin prime minister Narendra Modi hnena CAB chung changa memorandum an thehluh chu tun thlengin a la chhang lo tih Lancha chuan a sawi bawk. 

Lancha chuan hmarchhak biala MLA leh MP zawng zawngte pawh CAB hi dodal a, an duh loh thu lantir zel turin a ngen. CAB chu hmarchhak mite suatna ang hiala a ngaih thu sawiin, NEFIP chuan theihtawpin a dodal zel dawn a ni, a ti.  

RTI activist leh Krishak Mukti Sangram Samiti (KMSS) hotu Akhil Gogoi pawhin Pathaini khan Assam-ah CAB duh lohna lantir an tum tih a sawi. Press conference a neihah, Gogoi chuan KMSS leh a thawhpui organisation dang pathumte chuan state chhunga in tin tlawh kuala, CAB sawichianna leh an duh lohna thu ziahna lehkha sem kual an tum tih a sawi. 

Gogoi chuan, "Kan nihna humhimna turin CAB hi kan dodal zel dawn. Thisen chhuah hial pawh ngai se kan dinnaah hian nghet takin kan ding dawn a ni," a ti. November 22-ah KMSS hian CAB duhlohna lantira punkhawm an huaihawt dawn a, President leh Prime Minister hnenah Governor kaltlangin memorandum thehluh leh an tum. CAB dodal kawngah political party leh organisation  hrang hrangte an ṭanrual theihna turin theihtawp chhuah an tum tih Gogoi chuan a sawi bawk a ni. 

Hetihlai hian Assam health minister Himanta Biswa Sarma chuan CAB hi state leilung fate tan a hlauhawm lo a, an chanvote eng kawng mahin a nghawng buai dawn lo tih a sawi. Pathiannia Lakhimpur-a chan­chinthar lakhawmtute a kawm­naah, minister hian CAB chuan state chhunga mi nuai nga vel harsatna chu a chinfel sak dawn niin a sawi a, heng zinga mi nuai hnih vel chu Barak Valley-a cheng an ni, a ti. CAB chuan hmarchhak mite culture leh nihnate engmahin a tiderthawng dawn lo a ni, a ti.