Sorkar laipuiin Tripura sorkar chhanna nghak

Hmarchhaka Sixth Schedule area-a autonomous council-te thuneihna tam zawk pekna tura Constitution siamṭhat tum chungchangah, union home ministry chuan Tripura sorkar hnenah zawhna hrang hrang pein, a chhanna a nghak mek. 

Heng zawhnate hi Tripura chief secretary U Venkateshwaralu hnenah thawn a ni a, Constitution siamṭhatna tur tihfel a nih hmain Tripura state sorkar ngaih­dante hi ngaihtuah phawt a ni ang. Union cabinet chuan kumin January thla khan Constitution siamṭhatna tur hi a lo pawm tawh a ni. 

Nakkum April thlaah  Tripura Tribal Areas Autonomous District Council (TTAADC) inthlan neih a nih dawn avangin, sorkar laipuiin autonomous council thuneihna sang zawk pek a tum hian ngaihven a hlawh hle.  Tribal BJP MLA paruk chuan chief  minister Biplab Kumar Deb hnenah, auto­nomous district council (ADC) thu­neihna tihpun sak dan tur chungchanga rawtna an neihte an lo thehlut tawh a ni. CM hnenah hian Tribal Welfare Department hnenah cabinet meeting-a rawtna thlen turte buatsaih tir turin an ngen bawk. Congress party pawhin tribal council thuam chakna tura rawtna an neihte an lo thehlut tawh bawk.