CAB kan dodal zel ang : Meghalaya CM
Meghalaya chief minister Conrad Sangma chuan Citizenship (Amendment) Bill chu an state leh hmarchhak bial mipuite duh dan ang ni loa pass tum a nih chuan, a kaihhruai sorkar leh an party, National People's Party (NPP) chuan an dodal zel dawn tih a sawi.
Thawhṭanni aṭanga ṭan, Parliament winter session-ah BJP kaihhruai NDA sorkar chuan CAB hi ngaihtuah tur zingah a telh a ni. Conrad Sangma chuan, "He bill chungchangah kan ngaihdan hi chiang takin kan sawi tawh. State mipui emaw, hmarchhak bial mipuite duh loh dan anga siam a nih chuan, kan dodal zel dawn a ni. Kan mipuite duhdan hi kan tan chuan a pawimawh ber," tiin a sawi.
"CAB hi kan haw ngawr ngawr a ni lo. A hma pawhin a lo awm tawh. Mahse kan buaipui tak chu he bill hian eng tak nge sawi a tum. State leh mipuite duhdante ngaih pawimawh sak a ni em tihte kan hre duh a ni," tiin Sangma chuan he bill chungchang sawipui hian home minister Amit Shah pawh a hmuh tawh thu a sawi. Sangma chuan Amit Shah chu Shillong leh hmarchhak state dangte tlawh a, political party leh stakeholder hrang hrangte chu CAB chungchang hi sawipui turin a ngen tawh tih a sawi bawk.
NE state hrang hrangah CAB duhlohna lantir
BJP kaihhruai sorkar laipuiin Parliament winter session-a ngaihtuah tura a chhawpchhuah zingah CAB a tel avangin hmarchhak state hrang hrangah bill duh lohna lantir thar leh a ni. Thawhṭanni khan Assam, Manipur, Meghalaya, Mizoram, Nagaland leh Arunachal Pradesh-ahte hmarchhak zirlai pawl intelhkawm, North East Students' Organisation (NESO) huaihawtin zirlaiten bill duh lohna an lantir.
NESO chaun prime minister Narendra Modi leh home minister Amit Shah-te hnenah memorandum thehlutin, hmarchhak bial mipuite an duh loh thu nasa taka an lantir hnua sorkar laipuiin House-a bill putluh luih leh a tum chu an lawm lo hle tih a sawi.