Sorkarin HNLC dan pawnah hnawl

Sorkar laipui chuan Meghalaya-a inlak­hran duhtu pawl, Hynniewtrep Natio­nal Liberation Council (HNLC) chu tharum thawhna leh pawikhawihna dang dang an thlen fo avangin dan pawnah a hnawl. 

Ministry of Home Affairs (MHA) chuan thuchhuah siamin, HNLC leh a hnuaia pawl hrang hrang awmte chu Indian Union aṭangin Khasi leh Jaintia tribal-te chenna chu lak hran an duh tih an puang a ni, a ti. He pawl hian civil mite rikrap foin, sum an chhuh luihsak bakah pawikhawihna pawh an thlen fo a, hmarchhal helpawl dangte nen pawh inzawmin, Bangladesh-ah an pawl mi leh sate training pekna turin camp-te pawh an nei a ni, tiin MHA thuchhuah chuan a tarlang. 

MHA chuan HNLC member-te chu India ram thuneihna leh inpumkhatna tichhe zawngin an che a ni, a ti. An chetdan hi khuahkhirh thuai an nih loh chuan, HNLC hian an huang zauh zelin ralthuam an lalut ang a, civil mi leh security force tam tak nunna an laksak dawn a, India dodal zawngin an che chhunzawm zel dawn a ni, a ti. 

Hei vang hian HNLC lian zel tur leh hluar zel tur danna atan, Unlawful Activities (Prevention) Act, 1967 (37 of 1967) Section 3 sub-section (1) hnuaiha HNLC leh a hnuaia pawl hrang hrang te chu dan pawnah hnawl an ni, tiin MHA chuan a sawi. Kum 2000, November 16 khan HNLC hi dan pawnah hnawl a lo ni tawh bawk a, mahse a hnuah hlih leh a ni.