Meghalaya BJP MLA-in CAB-in Meghalaya a huam tel loh phût

Meghalaya BJP MLA San­bor Shullai chuan president Ram Nath Kovind hnenah memo­randum thehlutin, Parliament se­ssion-a ngaihtuah tur, Citizenship Amendment Bill (CAB) chu Me­gha­laya huam tel tir lo turin a ngen. 

MLA Shullai hian Thawh­lehni zan khan Meghalaya governor Tathagata Roy hmuin, governor hnenah President hnena memoradum a thehluh tur hi a pe a ni. Shullai chuan Sixth Schedule Article 244 behchhanin, CAB hian Meghalaya hi a huam tel loh a ngai tih a sawi. Schedule area te chu 2009 Act 95th amendment hnuaiah huam tir loh theih an ni tih sawiin, he Act hian Meghalaya state pum chu  Scheduled Tribe (ST) reservation hnuaiah a dah a ni, a ti. 

BJP MLA chuan state rem­tihna loin ramdang mi tupawh India khua leh tui nihna pek a ni tur a ni, a ti bawk. "Pakistan leh Afghanistan aṭanga rawn pemlut tam zawk chu an rama sakhaw thila tihduhdaha an tawrh vangte a ni. Hetihlai hian Bangladesh aṭanga rawn lutte chu sakhaw thil vang ni loin, hna thawh tur zawngte an ni zawk. Hei vang hian sakhaw thil vanga luhte thliarhran an har dawn avangin he bill hi pemlutte hnena India khua leh tui nihna pekna kawngah dik lo taka hman theih a ni dawn a ni," tiin a sawi. 

Hmarchhak state mipuite leh pawl hrang hrangte chuan he bill hi an dodal tih sawiin, Shullai chuan hmarchhak state pumah chuan dan loa ramdang mi lutte danna turin Inner Line Permit (IL) system hmang turin a ngen. Khasi Hills Autonomous District Council (KHADC) pawh­in CAB-in Meghalaya a huam tel loh phûtna resolution an pass tawh bawk a, he resolution hi Council-a member zawng zawngin an thlawp a ni.