Assam Congress MP-te'n NRL privatise duh lo

Assam-a Congress MP-te chuan sorkar laipuiin Numaligarh Refinery Limited (NRL) privatise a tum chu duh loin, Thawhlehni khan Parliament House  kawta Mahatma Gandhi lim bulah lungawi lohna an lantir. Assam Pradesh Congress Committee (APCC) president Ripun Bora chuan NRL privatisation hi an duh loh thu sawiin, NRL leh Assam mipuite chuan inzawmna nghet tak an nei tih a sawi a, sorkarin mimal kuta hlan a remti mai hi an hrethiam lo tih a sawi. He refinery hian hlawkna pawh tam tak a hmu tih sawiin, sorkar thiltih tum dan chu Assam mipuite chungah dik lo taka chetna a ni, a ti. 

Congress MP pathum,  Pradyut Bordoloi, Gaurav Gogoi leh Abdul Khaleque-te chuan sorkar chu Assam mipuite rilru tinaah puhin, Assam Accord palzutna a ni bawk tih an sawi. Union finance minister Nirmala Sitharaman chuan tunhnaiah BPCL privatise a nih tur thu hi a lo sawi tawh a ni. BPCL hian NRL-ah hian share nei tam berin 61.65% a nei a, Assam sorkarin 12.35% leh Oil India Limited-in share 26% a nei bawk. 

NRL hi Assam Accord, 1985 hnuaiah din a ni a, hmarchhak bial tana economy leh industry hmasawnna tura tih a ni. BJP chuan central-a NDA sorkarin NRL privatise-na tur hian thutlukna a la siam lo niin an sawi thung. Assam BJP thupuangtu Rupam Goswami chuan union petroleum minister Dharmendra Pradhan pawhin hemi chungchang  hi Assam chief minister Sarbananda Sonowal zawhna a chhanaah pawh a sawichiang a ni, a ti.