Agartala ATM aṭanga pawisa rutute man
West Bengal police-te chuan Tripura Police-te thu thlen bawhzuiin, Thawhlehni khan Agartala ATM hrang hrang aṭanga pawisa ṭhahnem tham tak ruchhuaktu, Turkey mi pahnih leh Bangladesh mi pahnih an man.
Tripura Police Cyber Crime branch Superintendent of Police Sharmistha Chakraborty chuan misualte hian ATM-cloning device hmangin Agartala-a ATM aṭang hian pawisa hi an ruchhuak tih an sawi. West Bengal police-te hian misualte hi Thawhlehni zing khan North 24 Parganas district-a Belgharia-ah man a ni, an ti. Thawhlehni vek khan Tripura police team chuan pawikhawihtu mi palite hi Tripura-a hruai turin Kolkata an pan nghal a ni.
Chakraborty chuan police-ten an mante hi Turkey mi pahnih Hakan Zanburkan leh Fettah Aldemir bakah Bangladesh mi pahnih Mohammad Hannan leh Mohammad Rafiqul Islam-te an ni tih sawiin, Agartala ATM aṭanga sum ṭhahnem tham tak an rukchhuah hnuah Kolkata an pan tih a sawi. November 15-17 chhung khan Agartala-a ATM 11 aṭangin cheng vaibelchhe 1.19 vel an ruchhuak hman a ni. Hemi hma, August thla pawh khan Guwahati-ah ATM aṭangin sum tam tak an lo ruchhuak tawh bawk niin a sawi.