Manipur-a Covid-19 thihpui zingah Hmeichhia aiin mipa an tam zawk

Manipur health department-in a tarlan danin, an state-a Covid-19 vanga thi mi 295 zingah hmeichhia aiin mipa an tam zawk. Hei bakah hian hripui thihpui zinga a tam zawk hi damdawi-ina dahluh an nih aṭanga darkar 24 chhunga thi an ni bawk. 

Health department director Dr K.Rajo chuan an state-a hripui kai leh thihpui an pun belh zel dan chu an department chuan a zirchiang. Hri kai thihpui zinga 77 chu damdawi-ina dah luh an nih aṭanga darkar 24 chhungin an thi a, mi  52 chu darkar 48 leh mi 33 chu darkar 72 chhungin an thi a ni. Hripui thihpui zingah 290 chu natna benvawn lo nei sa an ni tih a sawi bawk. 

Health director chuan an state-a Covid-19 vanga thi zingah kum 61-70 inkar an tam ber a, kum 15 hnuai lamah an tlem ber thung. Kum 16-30 inkarah hripui vanga thi hi mi  pariat an awm a, kum 31-45 inkarah mi 38, kum 46-60 inkar mi 93 leh kum 76-90 inkarah mi 93 bawk an awm. Kum 91 chunglamah coronavirus vanga thi hi pathum an awm bawk a ni. 

District hrang hrang zingah Imphal West district-ah hri thihpui tam berin mi 104 an awm a, Imphal East-ah 65, Thoubal leh Churachandpur district-ah 27 ve ve, Bishnupur-ah 17 leh Kongpokpi district-ah mi 12 in an thihpui bawk. 

Chief minister N Biren Singh chuan an state-a hri kai an la pun belh zel avangin Covid-19 kaite enkawlna tur chu Jawaharlal Nehru Institute of Medical Sciences (JNIMS), Imphal-ah khum 100 awm theihna tur an hawn belh leh dawn tih a sawi. 

RIMS Hospital-ah hri kaite enkawlna enkawlna hian isolation ward-ah khum 100 (ICU khum 17 telin), JNIMS-ah khum 145 (ICU-ah khum 15), Shija Hospital-ah khum 57 (ICU khum 15) leh Raj Medicity-ah khum 21 (ICU khum 4) a awm mek a ni. 

CM chuan hri  kai, in lama inenkawl phalsak, home isolation-a awm mekte tana helpline siam chu a lo hawng tawh bawk. He helpline hmang hian in lam inenkawl mekte chuan an harsatna neihte thlenin, thurawnte an la thei a ni.