Assam-Nagaland aiawhten kawngpui dan tihtawp remti

Assam khawpui, Guwahati-a Assam leh Nagaland aiawhten Inrinni liam taa inbiakna an neihah, Mariani-Mokokchung border-a state pahnihten kawng an dan tawn ve ve chu tihtawp an remti. 

Guwahati-a meeting neihah hian Nagaland aiawhte chu tribal affairs minister Temjen Imna Along-a'n a ho a, Assam chief minister Sarbananda Sonowal leh a official-te an tel bawk. 

Nagaland-in Assam ram chin a luahsak nia puhin, Assam-a pawl hrang hrangte chuan Mariani-Mokokchung inkalpawhna kawng­pui hi an dang a ni. 

Hemi chhan letna atan hian Nagaland-a pawl ṭhenkhat chuan an state lamah kawng hi an lo dang ve leh bawk a ni. 

Meeting-ah hian state pahnih aiawhte chuan state inṭhenawmte chu inngeih taka an awm a ṭul thute an sawi a, ramria buaina a awm palh pawha a chinfel dan ngaihtuah a nih thuai theihna tura an thawhdunna ṭha tak an neih a ṭul thute an sawilang bawk.