Assam sorkarin NRC hnawl turin ngen

Union home minister Amit Shah-a'n Parliament-ah National Register of Citizen (NRC) ram pumah kalpui a nih dawn thu a puan hnuah, Assam finance minister Himanta Biswa Sarma chuan an state-a NRC an lo kalpui tawh chu hnawl turin a ngen. 

BJP hruaitu chuan August 31-a Assam NRC final list tihchhuah chu fel tawk lo a tam tih sawiin, siamṭhat dan a awm tawh loh avangin state sorkar leh BJP chuan sorkar laipui hnenah hnawl sak turin a ngen tih a sawi. 

"Assam sorkar chuan  NRC list hi a pawm lo a, he list-ah hian telh loh tur telh mi tam tak an awm,  hetihlai hian India khua leh tui dik tak telh loh leh hmaih eng emaw zat an awm bawk," a ti. NRC state coordinator hlui, Prateek Hajela chu sawiselin, NRC a kalpuinaah hian state sorkar rawn loin, a duh angin a kalpui a ni, a ti. Mahse midangte chuan Assam sorkar kalpui angah ngaiin, mimal pakhat thiltih avangin mawhphurhna  leh sawiselna pawh sorkarin a tawh phah ta niin a sawi. 

India ram puma NRC  kalpui a nih tur thu Home Minis­ter-in a sawi chu lawmawm a tih thu Sarma chuan a sawi nghal bawk a, sorkar laipuiin an duhdan te a ngaihthlaksak avangin Assam sorkar pawh a lawm hle a ni, a ti.