Assam-ah Congress leh party panga thawk ho dawn
Assam assembly inthlan neih turah Congress party leh political party dang panga an thawk ho dawn.
Thawhlehni khan Congresss kaihhruai ṭangrual pawl din a nih thu hi Assam Preadesh Congress Committee presidetn Ripun Bora chuan a puang a, rorellai BJP kaihhruai sorkar paihthlak ngei tumin an bei dawn tih a sawi.
Eptu ṭangrual pawlah hian Congress bakah All India United Democratic Front (AIUDF) , CPI(M), CPI, CPI (M-L) leh regional party, Anchalik Gana Morcha te an tel dawn a ni.
Assam-a political party thar, All Assam Students Union (AASU) din Assam Jatiya Parishad leh Krishak Mukti Sangram Samiti din Raijor Dal-te erawh chuan eptu ṭangrual pawl hi an zawm ve lo a, an party pahnihte hian thawhdun dan an ngaihtuah mek thung.
Congress general secretary in-charge Assam Jitendra Singh chuan regional party hrang hrangte leh BJP paihthlak duhtu party-te chu thawhpui turin an inhawng reng tih a sawi. "Keini party parukte hian Assam chhanhim a, Assam ṭhalaiten hmathlir an neihte tihhlawhtlin sak an nih theihna pui tur leh, Assam hmasawnna thlenna a nih thehna turin, party dangte chu inlungrual taka inthlanah thawhpui turin kan sawm a ni," a ti.
Ṭangrual pawl din thar hian seat insem dan tur pawh an tifel thuai dawn tih an sawi a, AIUDF hruaitu chuan an thawhhona hnuaiah an party chuan seat 37 vel an chan an beisei tih a sawi a, mahse sawiho turin an inhawng reng tih an sawi bawk. Assembly seat 126 awmna Assam assembly inthlan hi kumin April-May thla hian neih a ni ang.