Silchar Medical College-a Covishield dah ṭhat a khal
Assam health department chuan Serum Institute siam Covid-19 vaccine, Covishield an dawn zinga Silchar Medical College and Hospital (SMCH)-a vaccine storage unit-a dah, vial 100 (dose 1,000) chu a khal vek tih sawiin, hengte hi enfiah turin laborator-ah thawn a ni.
Sorkar official chuan medical college hnenah hian vaccine dah ṭhat dan dik tawk loh avangin hriattirna pawh pek an ni tawh tih a sawi. Health department chuan vaccine khal te hi paih an ni lo a, hman chhunzawm tlak an ni dawn em tih laboratory report an nghak tih a sawi bawk.
Covishield siamtu, Serum Institute chuan vaccine te hi temperature 2-8 degree celsius inkarah dah ṭhat turin kaihhruaina a siamah a tarlang a ni. Assam cold-chain system hnuaiah vaccine-te hi Ice-Lined Refrigerators (ILRs)-ah dahṭhat leh phurh kual an ni a, a eng laiah hian nge thil fel lo awm tih chhui chian mek a nih thu official chuan a sawi. Vaccine-te hi a dahṭhatna hmunah nge, hospital-a phurh an nih laia khal an ni tih hriat chian tum mek a ni, a ti.
Assam hian Covishield bakah Bharat Biotech siam Covaxin a dawng a, heng vaccine-te hi ram puma vaccine pek chhuah ṭan ni, kar liam ta Inrinni aṭang khan a pe chhuak ve nghal a ni.