Manipur Sangai Festival ṭan SE Asia ambassador-te'n hmanpui

Manipur-in an state animal, Sangai puala kumtina Sangai Festival an buatsaih ṭhin chu Pathianni khan Imphal-ah hawn a ni a, festival hawnna inkhawm hi South East Asia ram ambassador-ten an hmanpui. 

Sangai festival hi tourism department leh forest depart­ment ṭangdunin an buatsaih a ni a, kum 2010 aṭang khan neih ṭan a ni. Festival hi state khawpui,  Imphal leh sazuk chi khat, Sangai te chenna Bishnur district-a Keibul Lamjao-a park-ah hman a ni ṭhin. 

Myanmar, Indonesia, Singapore leh Laos amba­ssador-te leh an chhungte bakah, ramdang mi khualzin eng emaw zatin Imphal-a festi­val hawnna hi an hmanpui a ni. He festival hi November 30 thleng neih a ni ang. Chief minister N Biren Singh chuan traditional "Mera Thaomei" chhiin festival hi a hawng a, Manipur state mipuite leh an state pawn lam mite chu festival hi chhim vek turin a sawm. Festival hawnni hian Khuman Lampak, Imphal-ah Manipur Sangai Run vailiam a ni bawk. 

Singh chuan state mipuite leh sorkar in an state humhalhna tura theihtawpa hma an lak avangin, an state tlawhtu khualzin pawh an pung chak hle tih a sawi. Tamenglong district-a Bunning meadow leh Tengoupal hill station-te chu tourist destination thar niin, a hmun mawi dangdai tak chuan khualzinte a hip thu a sawi. 

Sorkar laipui chuan Sangai ho chenna, Manipur-a Keibul Lamjao-a ethnic park chei ṭhatna atan Swadesh Darshan scheme hnuaiah cheng vaibel­chhe 38 dah a remti. 

Keibul Lamjoa-a festival hawnna inkhawmah Manipur forest and environment minister Thounaojam chuan he thu hi a puang a ni. Minister chuan ethnic park hi chei ṭhat a nih chuan, a chhehvel bialte tibuai loin he park-ah hian festival hi hman theih a ni tawh dawn a ni, a ti. Park chhehvela chengte chu fakin, Sangai bakah ramsa dang humhalhna kawngah an thawk ṭha hle tih a sawi. Sangai an humhalh dan chu khawvel tan pawh entawntlak a ni, a ti.