Guwahati-ah Japan-India summit nghat dawn
Japan leh India-in kum tina summit an neih ṭhin chu kuminah Guwahati khawpuiah nghah a ni dawn nia sawi a ni.
Japan-India summit neih ni tur tak hi puan la ni lo mah se December thla laihawl hian neih rin a ni a, prime minister Narendra Modi leh Japan prime minister Shinzo Abe te an tel ang. PM pahnihte hian Imphal an tlawh nghal dawn bawk nia sawi a ni.
Imphal-ah hian Indopui laia Japan sipai thite thlan eng emaw zat a awm, hei hi Japan PM hian tlawh a tum a ni. November 21-22 khan foreign secretary Vijay K Gokhale chuan top official-te nen Guwahati hi tlawhin, summit thleng tur atana an inbuatsaih dante an enfiah a, Imphal-ah pawh an kal nghal bawk a ni. Japan embassy aṭangin Japan palaite pawhin Guwahati leh Imphal hi an tlawh tawh bawk.
Japan hian Act East Forum hnuaiah hmarchhak biala investment lian tham tak tih a tum avangin, kumin summit neih tur pawh Guwahati-a nghah an remti a ni. Japan hian Assam-a water supply leh sewage project, Meghalaya-a road project, Tripura, Nagaland leh Sikkim-a forest management project leh Mizorama irrigation project-te a pui mek a ni.