Tripura-ah NRC kalpui a nih chuan CM post hi ka chan ang: Biplab

Tripura chief minister Biplab Deb chuan National Register of Citizens (NRC) chu an state-ah kalpui a nih chuan, Chief Minister post chu a chan dawn niin a sawi. 

Deb hian a pa leh a chhungte chu Bangladesh aṭanga rawn lut an nih thu sawiin, NRC hi Tripura-ah kalpui a nih chuan amah pawh a nghawng tur zingah a tel tih a sawi. He thu a sawina video clip hi social media lamah a darh nasa hle. 

"Ka chhungte, ka pa ngei pawh Bangladesh aṭanga lo kal an ni. Citizenship card a dawn hnuah kei chu Tripura-a piang ka ni. Mahse NRC vanga chan an awm a nih chuan kei pawhin chief minister post hi ka chan ve ngei dawn a ni. CM post hloh phahna tura NRC kalpui tura mi a ka ni lo," tiin Deb chuan a sawi. 

He clip hi Facebook, Twitter leh social media plat­form dangah an thehdarh nasa hle a, sawizui pawh a hlawh hle. A video clip hi CM hian West Bengal-a North Dinajpur district huam chhung, Raiganj leh Kaliyagani-a by-election campaign a neihnaa press conference a neih ṭuma mi lak chhuah a ni. Hetihlai hian CM media advisor Sanjay Mishra chuan CM thusawi hi a vaia thehdarh duh loin, mi ṭhenkhatin politics bawlh­hlawh tak khelin helai thu bikte chauh hi an lachhuak tih a sawi. A thusawi pumpuiah chaun Biplab hian NRC leh  Citizenship (Amendment) Bill thlawp zawngin a sawi a, hengte hi India khua leh tui dik takte venhimna tur a nih thu pawh a sawilang a ni, tiin  a sawi a ni.