Guwahati-ah 65th Filmfare Awards sem dawn

A vawikhatna atan Assam khawpui, Guwahati chu nakkum February 15-a sem tur,  65th Filmfare Awards thleng tura thlan a ni. Assam sorkar leh The Times Group chuan Thawhṭanni khan Guwahati-a 65th Filmfare Awards nghah a nihna tur hian inremna an ziak a ni. Filmfare Awards hi Hindi-language film tana chawimawina siam a ni a, khawvel huapah pawh film event ngaihhlut ber zingah a tel pha a ni. 

Assam chief minister Sar­bananda Sonowal chuan an state-in he hun pawimawh tak an thleng thei tur chu lawmawm a tih thu leh, a phur thu a twitter-ah a tarlang. Filmfare Awards chuan Assam ropuina leh mawinate phochhuahna hun remchang tak a siamsak dawn a ni tiin, he hun hi ropui leh hlawhtling taka hman a nih ngei theihna tura theihtawp chhuah turin a buaipuite chu a chah nghal bawk.