‘Ambassador of Peace’ award dawng turin Guwahati Archbishop thlang

Delhi-based International Human Rights Council chuan Guwahati-a Archbishop Thomas Menamparampil chu  ‘Ambassador of Peace’ award dawng turin a thlang. 

He award hi December 9 hian New Delhi-ah hlan a ni dawn a, he hunah hian ramchhung leh rampawn aṭangin sawm bik mi eng emaw zat an tel ang. ‘Ambassador of Peace’ award lo dawng tawh zingah Dalai Lama pawh a tel a ni. 

Kum 83 mi, Archbishop Thomas hi kum 1992 khan Guwahati-ah Catholic bishop hmasa berin a awm a ni. Hemi hma hian kum 11 chhung chu Dibrugarh-ah bishop a lo ni tawh bawk. 

Shillong-a Don Bosco Technical School leh St. Anthony's College-ah hun rei tak a lo thawk tawh bawk. Kum 1996-a Kokrajhar, Assam-a chi leh chi inkara buaina chhuak vanga mi nuai chuang zet tlanchhia a, relief camp-a an awm khan remna siam tumin theihtawpin  hma a la a ni. 

State sorkar leh mipuite pawhin a hmalakna an thlawp a, boruak ṭha tak pawh a awm zui theih phah ta a ni. Archbishop Thomas hi Churachandpur, Haf­long, Diphu, Udalguri, Men­­di­pathar leh Sarupathar-a tual­chhung buaina chhuak vanga mi tam tak tawrhna thlengah pawh remna siam hna thawk turin sawm a lo ni tawh ṭhin bawk. 

Hmarchhak biala boruak ṭha tak a awm chu lawmawm a tih thu sawiin, boruak muanawm tak a awm zel a beisei thu a sawi.