Tripura CM-in Sorkar laipuiah ṭanpuina dil
Tripura chief minister Biplab Kumar Deb chuan prime minister Narendra Modi hnenah an state ṭanpui tura ngenin, cheng vaibelchhe 2,300 a dil.
Tripura CM hian Tripura-a development project hrang hrang thawh mekte zawhna turin cheng vaibelchhe 1,000 pek belh turin a ngen. Thawhṭanni zan khan PM hi kawmin, an state mamawh hrang hrangte a sawipui a ni. PM Modi pawhin Deb ngenna hi lo ngaihtuahsak a tiam bawk. Deb chuan Tripura-a central scheme hnuaia project hrang hrang kalpui mekah hmasawn dante pawh Modi hi a hrilh a ni.
Deb hian PM bakah union minister panga - Defence Minister Rajnath Singh, Health Minister Dr Harsh Vardhan, DoNER Minister Dr Jitendra Singh, Minister of State (independent charge) for Power, New and Renewable Energy RK Singh leh Textiles Minister Smriti Irani te hmuin an state mamawh hrang hrangte a thlen bawk.
DoNER minister nena an inkawmnaah, Deb chuan ADC area hnuaia kawngpui siam leh project dang thawh mek atana sum ruahman chu cheng vaibelchhe 1,300 a tisang turin a ngen. Deb chuan Union Health and Family Welfare Minister hnenah Tripura-a primary health centre-te chu National Health Mission kaltlanga tichangtlung turin a ngen a, district hospital te tana fund dah pawh tihpun a dil bawk. CM chuan Dhalai district-a district hospital thar siam rawtna chu union minister hian a pawm tih sawiin, hna thawh ṭan a ni thuai ang, a ti.
Union Minister of Textiles, Women and Child Development Smriti Irani nena an inkawmnaah, Deb chuan Tripura-a hmeichhia leh naupangte dinhmun chawikanna tura hma lak dan tur hrang hrangte bakah, textiles scheme kalpui dante a sawipui bawk.