Meghalaya sorkarin Bawng vulhna hmun siam dawn

Meghalaya sorkar chuan South West Khasi Hills district-a Mawmerang khuaah bawng vulhna hmun, cattle ranch a siam dawn a, Ri-Bhoi district-ah bawng chaw siamna hmun din a tum bawk. 

Mawmerang khua hi bawng vulh lama lar sa an ni a, in tinin bawng vulh vekin South West Khasi district pum chu an bawnghnute tharchhuah in an chawm thei a ni. Milk mission hnuaiah Meghalaya sorkar hian programme hrang hrang a siama hamṭhatna dawng­tu tur mi 2,000 vel a thlang chhuak dawn a ni. Hemi hma hian bawng vulhna lama hamṭhatna dawng tur mi 100 a lo thlang tawh bawk. 

Indian Council of Me­dical Research (ICMR) in a tarlan danin, Meghalaya-ah hian mi pakhatin ni khata bawnghnute a mamawh zat hi gram 230 a ni a, mahse state chhung bawnghnute an tharchhuah hi ni khatah mi pakhat tan gram 83 chauh a ni thung. 

Bawng vulh lam uar zawka kalpuina turin Me­gha­laya sorkar chuan DPR buatsaihin, sorkar laipui  hnenah a thehlut. Ri-Bhoi district-a bawng chaw sawngbawlna tur hmun dah a pawimawh thute a thlen a ni. Chief minister Conrad Sangma chuan an state-in bawnghnute an mamawh zat metric ton nuai 2.3 a nih laiin, an tharchhuah chu metric ton 86,000 chauh a ni tih a sawi. Hei vang hian bawnghnute tam zawk tharchhuah a nih theihna tura bawng vulh lam uar a ṭul thu a sawi. 

Sorkar chuan bawng vulhtute thuam chakna turin programme hrang hrang a siam thu deputy chief minister Prestone Tynsong chuan a sawi. Mawiong-a Milk Produc­tion Centre pawh tihlen a nih thu leh, Tura leh Jowai-a bawngvulhna hmunte pawh tihchangtlun tum mek a nih thu a sawi bawk.