Meghalaya: HNLC-in flag leh constitution hran phût

Meghalaya helpawl, Hyn­niewtrep National Liberation Council (HNLC) chuan Khasi hnam tan flag leh constitution hran an phût ve leh. 

HNLC hian Khasi-te tan Par­liament leh Supreme Court hran neih pawh an phut tel bawk. Facebook-ah HNLC general secretary-cum-publicity secre­tary Sainkupar Nongtraw chuan hemi chungchang hi ziakin, sorkar laipui chuan hnam tenau leh tlem zawkten an chhawr ve theih loh tur dan an siam fo ṭhin tih Khasi mipuite chuan an theihnghilh tur a ni lo, a ti. 

Nongtraw chuan, "Inner Line Permit system in dil a, sorkar laipui chuan Citizenship Amend­ment Bill (CAB) a pe zawk che u a, Village Administration Bill (VAB) aiah sorkar chuan municipal election a duh zawk bawk a ni," tiin a sawi. 

HNLC hruaituin Facebook-a heng thu a post hma hian, sorkar laipu chuan Khasi helpawl dan pawna hnawl an nihna chu a pawhsei sak a ni. Ministry of Home Affairs chuan Khasi helpawl hian Meghalaya state-ah tharum thawhna a thlen chhun­zawm zel avang leh midangte rikrap zawnga an chet chhunzawm zel avangin dan pawna hnawl an nihna hi pawhsei a nih thu a sawi a ni.

Helpawl hruaitu chuan sorkar laipuiin hrekbeh a tum avangin Khasi mipuite zingah lungawi lohna a thleng zel a ni tiin, Hynñiewtrep state hran pek phutin an bei chhunzawm zel dawn tih a sawi. "India chuan Parliament, flag, constitution leh supreme court a nei a, hetiang bawk hian Khasi-te chuan Parliament, flag, constitution leh supreme court an nei ve tur a ni," tiin, hetianga intluktlanna nei tur hian an bei tih a sawi. 

HNLC hruaitu chuan India rama an awm chhung chuan, Khasi te chuan an dikna chanvo an nei thei dawn lo nia an ngaih thu a sawi bawk.