Manipur CM-in Festival boycott titawp turin ngen

Manipur chief minister N Biren Singh chuan Coordinating Committee on Manipur Integrity (COCOMI)  hnenah Manipur Sangai Festival hman mek an boycott chu titawp turin a ngen. 

Naga peace talk neih mekin Manipur a nghawng tel duh lo a, Manipur ram chin humhalh duha hmala tu, COCOMI hnuaiah hian civil society organization hrang hrang an tel a ni. State humhalh chungchang buaipui lai meka Sangai Festival lo huaihawt chu a hun lo nia sawiin, he festival hi an boycott a ni. 

Nilaini khan CM chuan Imphal-a Durbar Hall-ah press conference neiin, Manipur Sangai Festival chu Manipur mipuite hmalam hun thlira buatsaih a ni tiin, he festival hi an state tan inchhuanna tham a nih mai bakah, an state ropuina leh danglamna te pholanna tur a nih thu a sawi. 

CM chuan Naga peace talk neih mek chungchanga COCOMI ten Assembly special session ko tura an ngen angin, December 20 hian Manipur Legislative Assembly Winter Session neih a ni dawn tih a sawi. An thil phutte tihhlawhtlin a nih avangin, COCOMI pawhin an nawrh titawpin, festival an boycott pawh an titawp ve tur a ni, a ti. 

Singh chuan state sorkar lakah rinna nghat ngam turin mipuite a chah a, an state leh mipuite tana ṭha lo tur zawnga thiltih a awm chuan an ngawi mai mai dawn lo tih a sawi.