Tripura CS hlui UP-ah man

Tripura chief secretary hlui, Yash Pal Singh chu  Public Work Department (PWD) sum tam tham tak tihchingpenna kaihhnawihah Thawhṭanni khan Uttar Pradesh-a Ghaziabad district-ah UP leh Tripura police joint team-ten an man.  

Acting Tripura Director General of Police, Rajiv Singh chuan CS hlui hi Uttar Pradesh-a court-ah hruaiin, court phalna lak hnuah Agartala-ah hruai a ni dawn tih a sawi. 

Yash Pal Singh hi kum 2008-09 khan state Principal Secretary (PWD) a ni a, he dinhmun a chelh lai hian PWD hnuaia cheng vaibelchhe 638 man project hrang hrang a thawhnaah sum tam tham tak tihchingpen a ni.  Hemi kaihhnawihah hian nikum October thla khan Tripura sorkar hnuaia Vigilance Wing chuan PWD minister hlui Badal Choudhury, CS hlui Yash Pal Singh leh PWD CE  hlui Sunil Bhowmik te lakah FIR a ziak lut a ni. 

Chowdhury leh Bhowmik te man an ni tawh a, nikum October thla vek khan Tripura High Court chuan bail-a chhuah a phalsak a ni. Singh hi man tumin hun eng emaw chen an zawng tawh a, state chhung leh Delhi-ahte an zawn kual hnuah Ghaziabad-ah an man ta a ni. 

Law and Education minister Ratan lal Nath chuan Left Front sorkar khan kum 2008-09 khan PWD project 13, cheng vaibelchhe 638 man a thawk a, mahse heng project thawhna tura cheng vaibelchhe 164 chu tihchingpen a ni tih a sawi. Hei hi Tripura-a sum tihchingpenna thleng lian ber a ni tih a sawi bawk. 

Hetih lai hian CPI-M  hruaitu leh chief minister hlui, Manik Sarkar chuan an state-a BJP kaihhruai sorkar thil tih dan chu a dik lo nia sawiin, sorkar hmasa tihhmingchhiat tuma beihna atan CPI-M central committe member Choudhury lakah phiarrukna an hmang a ni, a ti. Sarkar chuan, "Tripura-a Left Party-in kum 35 (1978-1988 leh 1993-2018)  ro a rel chhung khan eirukna thleng engmah a awm lo. State infrastructure  leh sector dangah pawh hmasawnna nasa tak a thleng zawk a ni," a ti.