APSSB recruitment exam kalpui danah thubuai ziak lut

Arunachal Pradesh Staff Selection Board (APSSB) in recruit­ment examina­tion a buatsaih danah thil dik tawk lo a awm nia sawi vangin, Aru­na­chal Pradesh Police hnuaia Special Inves­tigation Cell (SIC) chuan sorkar thupek angin thubuai a ziak lut a, thil awmdan chhui chian mek a ni. 

Chief minister Pema Khandu chuan hemi chungchang hi a twitter-ah tarlangin, APSSB lakah hian Prevention of Corruption Act section 13(2) leh IPC section 120B  hnuaiah FIR ziahluh a nih thu a sawi. 

APSSB in February 2-a lower divisional clerk (LDC), junior secretariat assistant (JSA)  leh post dang exam a buat­saihah  hian candidate, Roll No. 2025546 OMR sheet pakhat chu a chhanna engmah awm loa thehluh a ni. Mahse exam result tihchhuah a nih hnuah he canidate hi skill test nei tura thlan chhuah zingah a tel a, a OMR sheet hi social media lamah pawh an thehdarh zui nasa hle. 

All Arunachal Pradesh Students’ Union (AAPSU) pawh­in dik lo taka thiltih  hi an dem thu sawiin,  police-te pawh thil dik lo titu chu chhui chhuak a, hremna pek ngei an phut thu an sawi. AAPSU general secretary Tobom Dai chuan, "He thil thleng hian state sorkarin hna lakna reng reng dik leh felfai taka kalpui a tiamna chu a tichhia a ni," a ti.