Sorkarin ULFA hremna kum nga atan pawtsei

Sorkar laipui chuan Assam hel­pawl, United Liberation Front of Asom (ULFA) dan pawna a hnawlna chu kum nga dang a pawtsei. 

Ministry of Home Affairs (MHA) chuan Ningani khan thu­chhuah siamin, ULFA te chu pawi­khawihna hrang hrang - inthah, mi ruk bo leh mi sum chhuh luihnaahte an la inhnamhnawih chhunzawm reng avang leh, Assam inpumkhatna tichhe zawnga an chet avangin  hremna hi pawhsei a nih thu a tarlang. 

MHA chuan Unlawful Activi­ties (Prevention) Act, 1967 (37 of 1967) section 3 sub-section (1) hnuaiah ULFA leh a hnuaia pawl hrang hrangte chu dan pawnah hnawl chhunzawm an ni tih a sawi. Sorkar laipui chuan kum 2015, January 1 aṭanga July 31, 2019 inkar chhungin ULFA hi tharum thawhna ṭum 70 thlengah inhnamhnawihah a puh. Heng tharum thawhna thleng hrang hrangah hian civil mi 25 leh secu­rity force pasarih an thi a ni. 

ULFA chu tharum thawhna bakah, sum phut vanga mi rukbo, mipuite tithlabar zawnga mi rikrap leh security force, political leader leh sorkar hmun pawimawhte bei tura an mi leh sate zirtirah puh an ni bawk. Kum 1979 khan ULFA hi din a ni a, 1990 khan a ṭum khatna atan dan pawnah hnawl an ni. Hemi hnu hian sorkar chuan hremna hi a pawtsei chhunzawm zel a ni.