Meghalaya : Zirlai 10 aia tlem awmna school khar dawn

Meghalaya sorkar chuan zirlai 10 aia tlem awmna sorkar school te chu khar a tum. School education minister Lakmen Rymbui chuan state chhung­ah primary leh upper primary school, zirlai 10 nei tlinglo 221 zet an awm tih a sawi. "Education depart­ment chuan state cabinet hnen­ah heng school te hi kharsak emaw, a nih loh pawhin enkawlna tur sum pek ṭhinte tihtawp tura rawtna kan thlen dawn a ni," a ti. 

Minister chuan heng school  enkawlna atan hian sorkar chuan kumtin cheng vaibelchhe 20 vel a seng a, hei vang hian school-te hi khar a nih chuan a enkawlna sum hi school dang tan a hman theih dawn a ni, tiin a sawi. Hemi rual hian school khar emaw, fund pek ṭhin tihtawp emaw chu Right to Education (RTE) Act kaihhruaina anga kalpui a ni dawn a, zirlaiten an tawrh phah dawn lo tih a sawi zui bawk. School kharsaka zirtirtute chu school dang, zirtirtu tlemnaah dah a ni dawn tih a sawi. School ṭhenkhatin zirlai an neih tlem chhan hi an awmna bial vela school a tam vang nia a ngaih thu a sawi bawk.