UNLF hotuin Manipur a thleng

Manipur helpawl, United Natio­nal Liberation Front (UNLF) chairman R.K. Meghan chu Ni­ngani tlai khan Manipur a thleng a, kum 44 hnua Manipur-ah a kir lehna hmasa ber a ni. 

Kum 72 mi Meghan, an state-a Sanayaima tia hriat lar zawk hi November 9 khan Guwahati central jail aṭangin chhuahtir a ni. Jail aṭanga a chhuah hnu hian Manipur lam pan a tum a, mahse Naga peace talk chungchang avanga Manipur pawl hrang hrangten nawrh an huaihawt avangin boruak ṭha lo zawk a chhuah palh venthawn thilah Delhi lamah hruai a ni. Delhi-ah hun eng emaw chen a awm hnuin, Ningani khan Manipur-ah a kir a, Imphal airport-ah a chhungte leh amah duhsaktu mi eng emaw zatin an lo hmuak. 

Meghan hi kum 2010, Decem­ber thla khan National Inves­tigation Agency (NIA) chuan Bihar-a Motihari khuaah, Nepal aṭanga rawn lut, Bangla­desh pan a tum chu an man niin an sawi. Mahse Meghan chuan India sorkar thurawn angin Bangladesh thuneituten security agency kutah hian an hlan zawk niin a sawi thung. NIA chuan special court-ah kalpuiin, damchhung tang tura hremna pek an phut. Mahse court chuan kum 2016 khan kum 10 tang turin a hrem ta zawk a ni. 

A tan  hun hi la tlak lo mah se, tanin chhunga a nungchang ṭhat avangin a hun hmain chhuah zalen a ni ta a ni.