Malala kaptu jail aṭangin tlan chhuak

Pakistan chuan Thawhṭanni khan Nobel Peace Prize lo dawng tawh,  Malala Yousafzai kaptute zinga inhnamhnawih nia puh Tehreek-E-Taliban Pakistan (TTP) firfiak hotu Ehsanullah Ehsan chu jail aṭanga a tlan chhuah thu an ram mipuite hriatah a sawi chiang ta.

Kum 2012-a Malala Yousafzai, a lua kah chungchang bakah, kum 2014-a Army Public School (APS) beihnaa mi 150 thihna thlengah pawh khan Ehsan hi a inhnamhnawih nia puh a ni bawk. APS beihnaa thi zingah hian zirlai an tam ber a, he thil thleng vang hian zirlai nu leh pate chu lungawi loin Ehsan lakah hian Pakistan-a Peshawar High Court-ah thubuai an ziak lut nghal a ni. 

Pakistan Interior Minister Ijaz Shah chuan an ram sipaiten kum thum chhung Ehsan hi Pakistan security agencies jail-ah an khung thu a sawi. Mahse Islamabad-a tualchhung chanchinthar thehdarhtute nen inbiakna an neihnaah Ehsan chungchang zawhna chu chhangin, jail aṭang a tlan chhuah thu hi a sawi chiang ta a ni.

Ehsan hi kum 2017, April 17 khan Pakistan army leh ISI kutah a inpe a, India external intelligence agency leh Research and Analysis Wing (R&AW) tana hna a thawh ṭhin thu a puang chhuak a ni. 

Jail aṭanga a tlanchhuah hnuah Ehsan hian social media lamah a audio clip dahin, Pakistan a chhuahsan thu leh, Turkey-a a nupui leh a fate nena an awm thu a sawi chhuak bawk. 

Kum 2017-a sipaite kuta a inpek khan mumal taka inremsiam neia inpe a nih thu sawi langin, an inremna a anga engmah a kal ta si lohah chuan Pakistan aṭangin kumin January 11 khan a tlanchhuak tih a sawi.