Assembly inthlanah Sikkim CM-in chuh thei dawn EC-in a hremna tihnep sak

Election Commission chuan Sikkim chief minister Prem Singh Tamang-a inthlan chuh thei lo tura a hremna, disqualification period chu kum nga dawnin a tihtlem sak a, hei vang hian state assembly inthlanah pawh CM hian a chuh thei dawn a ni. 

Eiruk thubuaia thiam loh chantir a nih avanga tantir a nih hnuah, a tan hun tawp  kum 2018, August 10 aṭang khan inthlan chuh thei lo turin kum ruk chhung hrem a ni. He hremna hnuaiah hian state assembly inthlan neih leh hunah pawh CM hian a la chuh thei dawn lo. Mahse he hremna hi Pathianni khan Election Commission chuan siamṭhain, kum khat leh thla khatah a tihniam sak ta a ni. 

Kumin April thlaa assembly inthlan neihah khan, Tamang kaihhruai Sikkim Krantikari Morcha (SKM) party chuan hnehna changin, May 27 khan chief minister atan lakluh a ni. Mahse a thubuaia thiam loh chantir a lo ni tawh avang hian inthlanah hian Tamang hian a chuh ve thei lo. Chief minister ni chhunzawm zel tur chuan lakluh a nih aṭanga thla ruk chhung ngeiin assembly inthlanah a chak a ngai. 

Tamang hi minister of animal  husbandry a nih lai, kum 1990 chhoah khan cow distribution scheme hnuaia sorkar sum tichingpenah puh a ni a, kum 2003 khan Prevention of Corruption Act hnuaiah thubuai siamsak a ni. Thiam loh chantirin kum khat jail tantir a ni a, a tan hun hi kum 2018 khan a tlak tawh a ni. 

EC chuan Pathianni-a Tamang hremna chungchang a ngaihtuahnaah, inthlan chuh thei loa hrem hun chu kum khat leh thla khatah a pawhtawi sak thu a sawi. Hei hi jail a tan hun tawp aṭanga chhiar ṭan niin, hremna hi September 10 hian a tawp tawh dawn tih a sawi. Hemi hnu hian chief minister ni chhunzawm turin inthlan pawh a chuh thei tawh ang.