BJP zawm ka tum lo : Ex-Tripura Congress chief

Tripura Congress unit president hlui, Pradhyot Kishore Manikya Debbarman chuan All India Congress Committee (AICC) member a nihna aṭanga banna a thehluh hnuah, BJP zawm tumna a nei lo tih a sawi. 

Congress party aṭanga a ban hnuah, Debbarman hian BJP a zawm dawn nia sawi thawm a awm a, hei hi Pradhyot chuan chhangin, BJP zawm chakna a neih loh thu a sawi. Kar kal ta Inrinnia thuthar theh­darhtute a kawmnaah Debbarman chuan, "2018 assembly inthlan neih hma khan BJP high command lam aṭangin sawmna pawh ka dawng a, BJP chief Amit Shah  ngei pawhin min sawm a ni. Mahse BJP zawm tumna hi englai mahin ka nei ngai lo," tiin a sawi. 

Debbarman hi Tripura lal thlah niin, Congress chief atana dah a nih khan an party pawhin hma an sawn phah hle nia sawi a ni. Mahse nikum October thla khan Supreme Court-ah an state chhunga National Register of Citizens (NRC) kalpui ve phutin petition a thehlut a, hei hi party hruaitu senior-ten duh loin an inkar boruak a chhiat phah a ni. Debbarman chuan a petition thehluh hi hnukdawk turin party lam aṭangin an nawr nasa niin a sawi a, hei bakah hian Autonomous District Council (ADC)-a Article 244 (A) kalpui a phutna chu sut turin an nawr bawk. Hengte hi a sut duh loh vangin Congress hotu a nihna aṭangin a bang ta a ni. 

Congress hruaitu hlui hian party hotua dah a nih hnuah, an party-ah chuan ṭhalai leh hmeichhiate bakah, mi thar zawkte vawrchhuah a tum a, hei hi senior leader lamin an lo pawmpui thei lo tih a sawi bawk.