Hmarchhakah seaplane hmang dawn

Hmarchhak biala tourism tihchangtlun a, khualzin tam zawk hip luh an nih theihna turin Airport Authority of India (AAI) chuan a vawi khatna atan Assam-a hmun pathumah water aerodrome, seaplane a hmang dawn. 

AAI Regional Executive Director Sanjeev Jindal chuan ramchhung hmun hrang hrangte an zirchian hnuah, Assam-a hmun pathuma seaplane hman hi an remti tih a sawi. Hei hian inkalpawhna leh tourism a tihchangtlun phah dawn tih sawiin, India rama a hmasa ber turin Assam-a lui pathumah chuan water-based ferry hman a ni dawn tih a sawi. 

Jindal chuan, "Nakkum kumtawp lam emaw, kum 2021 kumtir lamah emaw chuan Brahmaputra lui leh Umrangso reservoir-ah seaplane service hi kalpui a ni ang. Seaplane service-na tur hmun pathum thlante chu Guwahati, Umrangso (Dima Hasao district) leh Kaziranga National Park-te a ni," a ti. Seaplane service tir tur hi pakhat cheng vaibelchhe 50 man vel a nih thu a sawi bawk. 

Sorkar pawhin seaplane service tir tur hi UDAN (Ude Desh ka Aam Naagrik) scheme hnuaiah kalpui a nih tur thu a sawi tawh bawk. UDAN hi regional connectivity scheme, regional airport-te cheiṭhat leh tihhmasawn a, mipui nawlpuite zin ngamna tura thlawhtheihna zin man tlawm zawk leh service zau zawk siamte chu a thil tum zingah a tel. 

India ramah hian a vawi khat­na turin kum 2017 Decem­ber thla khan prime minister Narendra Modi chuan Ahmedabad-ah sea­plane hi a lo hmang tawh a ni.