Assam-in FT a thawk tur mi 1,600 la dawn

Assam sorkar chuan tunhnaia Foreigners' Tribunal 200 a din thara thawk tur, mi 1,600 chu contract-in a la dawn. 

Home department official chuan Tribunal-a thawk tur Home Guard 400 pawh ruat an ni dawn tih sawiin, tribunal din tharte hi ṭha taka kalpui nghal an ni dawn tih a sawi. Assam sorkarin August 31-a National Register of Citizens (NRC) final list a tihchhuahah mi nuai 19 zet an tel lo a, heng mite chungchang ngaihtuah tur hian sorkar chuan Foreigners' Tribunal hi a din ta a ni. 

National Register of Citizens list-a tel lote hian list tihchhuah a nih aṭanga ni 120 chhungin Foreigners' Tribunal-ah complaint an thehlut thei a ni. Heng complaint lutte hi tribunal chuan November thla aṭangin a ngaihtuah ṭan ang. 

NRC list tihchhuah a ni hnuah Foreigners' Tribunal 200 siam thar nen, Assam-ah hian FI hi 300 an awm tawh a ni. Sorkar chuan tribunal hi a dang din belh a la tum bawk.