Tripura CM-in mau aṭanga thil siam lakluh khap duh

Tripur chief minister Biplab Kumar Deb chuan sorkar laipui chuan mau aṭanga thil siamte ram pawn lam aṭanga lakluh a khap chuan, mau chinna hmarchhiak bialten an hlawkpui thei dawn a ni, a ti. 

'Bamboo Artisans' Conclave' a hmanpuinaah, Tripura CM chuan hmarchhak biala state pariatte chu mau tamna hmun a ni a, heng state aṭanga mau tharchhuahte hian rampawn lam aṭanga lakluh khap pawhin mamawh ang an pechhuak thei dawn a ni, tiin a sawi. 

"Sorkar laipui chuan a hmain mau aṭanga thil siam lakluh chung­changah khuahkhirhna a lo siam tawh a ni. Kum tinin mau aṭanga thil siam hrang hrang lakluhna atan hian cheng vaibelchhe nuai khat vel sen a ni ṭhin," tiin, sorkar document-a a landanin hmarchhak biala 34.5% chu mau hmun a ni a, ram chhunga mau awm zat aṭanga 45% chu hmarchhakah a awm tih a sawi bawk. 

Tripura state hian kum 2010 thleng khan mau hi ton 29,000 vel zet tharchhuakin, ramchhung state dang hnenah a supply ve leh ṭhin a. Mahse tunah chuan mau an tharchhuah hi ton 1,250 velah a tlahniam tawh a ni. Industries and Commerce depart­ment changtu ni bawk, CM Deb chuan a kaihhruai sorkar chuan bamboo sector chu mi tam tak tan eizawnna tlaka siam a tum tih a sawi. Tripura-a chhungkaw 50,000 vel tal chu mau hmanga thilsiama eizawnna siam sak an tum tih a sawi. Mau hmanga eizawngte sum lakluh pawh a let thuma tihpun an tum tih a sawi bawk. 

Chief minister Deb chuan Tripura-ah chuan India rama mau chi hrang 130 awm zinga 21 a awm tih a sawi a, hectare 17,000 - 18,000 a zauah mau hi chin mek a ni, a ti.