Sikkim CM-in by-poll a chuh dawn

Election Commission-in inthlan chuh thei lo tura Sikkim chief minister Prem Singh Tamang-a hremna a tihnep sak hnuah, Sikkim Krantikari Morcha (SKM) president hian October 21-a by-poll neih tur atan Thawhṭanni khan nomination paper a thehlut nghal. 

Sorkar sum tichingpena puhnaa thiam loh chantir a, jail-a tantir a nih tawh avangin Prem Singh Tamang hi kum ruk chhung inthlana chuh thei lo turin hrem a ni. Mahse EC chuan a hremna hi ennawnin, hremna pek hi kum nga dawnin a titlem a, kum khat leh thla khatah a tihniam a ni. A tan hun chhung nena chhut a nih hnuin, he hremna hi September 20 khan a tawp. Hei vang hian by-poll neih turah pawh a chuh thei ta a ni. 

Prem Singh Tamang hi May 27 khan chief minister atan lakluh a ni. Mahse assembly member a la ni lo a, CM ni chhunzawm zel tur chuan lakluh a nih aṭanga thla ruk chhung ngeiin assembly member atan thlan tlin a ngai a ni. 

Thawhṭanni kha by-poll neih tur atana nomination paper thehluh theih hun tawp a ni. Poklok Kamrang assembly biala by-poll neih tura tan hian CM bakah midang 17-in nomination paper an thehlut a ni. Rartam Rumtek bialah candidate pariatin nomination paper an thehlut a, Gangtok seat-ah candidate paruk an awm bawk. Footballer hlui Bhaichung Bhutia pawhin Gangtok bial by-poll neih turah a party, Hamro Sikkim Party (HSP) hmingin a chuh dawn.