Congress-in Sikkim by-election boycott dawn

Congress party chuan Sikkim by-election neih tur chu a boycott dawn tih a sawi. 

Congress chuan Election Commi­ssion of India-in kum ruk chhung inthlan chuh thei lo tura Sikkim chief minister PS Tamang hremna pek tawh a tihnep sak chungchangah na takin EC a sawisel. 

Sikkim CM hi sorkar sum tihchingpen thubuaiah thiam loh chantirin kum khat chhung tantir a lo ni tawh a, a tan hun hi tlak tawh mah se thiam loh chantir a nih avangin kum ruk chhung inthlan chuh thei lo tura hrem zui a ni. Mahse EC chuan he hremna hi a ennawn hnuah kum nga dawnin a tihhniam sak a, a tan hunte chhiar tel a nih avangin a hremna hi September 20 khan a zo a ni. Hei vang hian by-election neih turah pawh CM hian a chuh ve thei dawn a, nomination paper pawh a thehlut tawh. 

Congress chuan CM Tamang kaihhruai SKM leh BJP-ten by-election neih tura thawhdun an tum thu an sawi tukah, EC-in CM hremna ennawn a, zalenna a pe ta chu hriatthiam har an tih thu leh, he thil hi ngaihtuah zui ngai tak a ni, tiin India ram Constitution pawh a him tawh lo nia a lan thu an sawi. 

Regional party pahnih, SDF leh SKM-te chu na taka sawi­selin, Congress hruaitu Bharat Basnet chuan heng party pahnihte hian Sikkim politics-ah BJP an lalut tih sawiin, Sikkim mipuite phatsanah a puh bawk. Hei bakah hian eiruk thubuaia thiam loh chantir a ni tawh chunga chief minister atana PS Tamang a ruat luih avangin state governor Ganga Prasad pawh a dem thu a sawi bawk.