SC-ah Tripura sorkar zualko dawn

Tripura High Court-in state chhunga temple-a ran hlan khapna a tihchhuah chungchangah, Tripura sorkar chu Supreme Court-ah zualko a tum. 

State Law and Parliamentary Affairs minister Ratan Lal Nath chuan High Court thupek siam chungchangah hian state mipuite ngaihdan a inang lo hle tih a sawi a, hei vang hian Supreme Court lama thlen an tum tih a sawi. 

"High Court thutlukna chu kan zah hle. Mahse tuna a thutlukna siamah hian mipui ngaihdan a inang lo hlawm hle a, hei vang hian zau zawka thlira thiltih a ngai a ni. State sorkar chuan Supreme Court-ah special leave petition (SLP) a thehlut dawn a ni," tiin Nath chuan a sawi.

"Sakhuana thil hi chu mimal thil a ni. Hindu-ah pawl hrang hrang awmin, an kaldan a in ang vek lo. Tantrik-te chuan puja chu ransa hlan tel loh chuan a kim loah an ngai a, an rin dan dodal a, midang rilru tihnat hi kan duh lo a ni," a ti. 

September 27 khan Tripura High Court division branch, chief justice Sanjoy Karol leh justice Arindam Lodh awmna chuan, Tripura state-a temple-ah mi tumahin inhlanna atana ran an hman phalsak an ni tawh dawn lo tih an sawi a ni. Mahse High Court-in khapna a tihchhuah hnuah pawh, Gomati district-a Tripureswari temple-ah chuan ran leh arte chu hlan chhunzawm an la ni tho.