PM-in Assam-ah land patta nuai 1.06 pe chhuak dawn

Prime minister Narendra Modi chuan Assam leilung fate tan land patta/allotment certificate nuai 1.06 a sem chhuak dawn. 

PM Modi hian vawi­inah Assam a tlawh dawn a, Sivasagar district-a Jerenga Pothar-a hun a hmanah land patta hi a sem chhuak dawn a, hei hi Assam-a ṭum khata land patta sem chhuah tam ber a ni ang. Chief minister Sar­bananda Sonowal chuan PM hian Assam leilung fa, hun rei tak ram nei loa awm tawhte hnenah land patta hi a pe dawn tih a sawi a, hetianga leilung fate puala hmalakna hi Assam sorkar dangin an la ti ve ngai lo a ni, a ti. 

Sonowal chuan sorkar ram leh tribal hnam ramte chu dan loa pem lutten an luahsak fo tih sawiin, a kaihhruai BJP sorkar chuan dan loa mi dang ram neihsaktute hi hnawhchhuah a, heng ramte hi leilung fa dik tak, a tam zawk tribal OBM leh tea-garden labourer-te hnenah pek a tum a ni ,a ti. 

CM chuan sorkar hmasa, Congress sorkar sawisel zui nghalin, an hunlai khan leilung faten land rights an phutnate an ngaihthah a, hei vang hian mi tam tak chu hlauthawng takin an awm reng a ni, a ti. Mipuite rilrua hlauhthawnna awmte chu a kaihhruai sorkar chuan a tihtawp sak dawn a, Prime Minister chuan an hmalakna bul ṭanna hi a rawn neihpui dawn tih a sawi. Mipuite beiseina tihhlawhtling turin, BJP kaihhruai chuan 'jati, mati and bheti' (community, land and roots) humhalhna turin he hmalakna hi a kalpui tih a sawi a ni. 

State sorkar hian kum 4.5 chhungin land patta hi  2,28,160 pek chhuah a tum a, a bul ṭanna atan  January 23 hian mi nuai 1.06 hnenah pek chhuah a ni dawn a ni. A hmain ram nei lo chhungkaw nuai khat chuang hnenah land patta hi a lo pe tawh bawk. Kum 2016 khan Assam-ah hian leilung, ram nei lo chhungkaw nuai 5.75 an awm.