AAPSU-in China sorkar hmalakna chhan let phut

All Arunachal Pradesh Students' Union (AAPSU) chuan China-in an state chhung, upper Subansiri district-a khua a din chungchang chu ngaihven a, chhang let dan ngaihtuah turin sorkar laipui an phut tih an sawi. 

Ningania thuchhuah an siamah, AAPSU chuan China-in an state-a hma a lak chungchang sorkar laipui chuan a ngaimawh tawk lo a, ṭawngkam chauha a lawm loh thu a sawi ṭhin avangin China-in a ram zauh zel hna chu ngampa takina kalpui zel a ni, a ti. 

AAPSU hotu Hawa Bagang chuan Arunachal Pradesh chu India rama awm a ni, state mipuite pawhin hei hi an chhuangin India ram chu an hmangaih a ni, a ti. Ramin a ko a nih chuan ṭhalaite chuan ralthuam nena ram chhan tura inpe turin a inpeih reng tih a sawi. 

Prime minister Narendra Modi hnenah an state ramria thil thlengte chu ngaihven tur leh, ramria sipai dah ringawt duh tawk lo a, infrastructure leh kawngpui ṭha siam hmanga China chet dan chu chhang let ve tura an duh thu Bagang chuan a sawi a ni.

Hetih lai hian India ram china khua din nia puhna chu China chuan a pha thung a, Ningani khan China foreign ministry chuan an ram china hmasawnna hna an thawh chu thil danglam lo, a nihdan phung tur a ni, a ti. 

China foreign mi­nistry thupuangtu Hua Chunying chuan Zangnan region (South Tibet)-a China dinna chu a la ngai reng a ni. Arunachal Pradesh tia sawi hi englai mahin kan la pawm ngai lo, tiin Beijing-a chanchinthar lakhawmtute a kawmnaah a sawi. 

Arunachal Pradesh hi China chuan Tibet chhim lama bet niin a pawm a, hetih lai hian India chuan AP hi India rama awm, pawh ṭhen theih loh tih a sawi thung.