Nagaland CM-in Plastic dona kawngah hma a hruai

Nagaland chief minister Neiphiu Rio chuan Nilaini khan state puma plastic paih lakkhawmna tur, Mahatma Gandhi piancham kum 150-na puala buatsaih chu a hawng.

He programme hi Swachhata Hi Seva peng pakhat atana buatsaih niin sorkar laipuiin ram puma plastic-in bawlhhlawh a siam tihbona tura hmalakna a ni. State khawpui Kohima-a NST bus stop-ah hawnna programme hi hman niin, Neiphiu Rio chuan India Hnampa Mahatma Gandhi zahna hlanin ram faina kawnga hmahruaitu leh hmalatu ber a nih thu a sawi. Prime minister Narendra Modi kaihhruaina hnuaia sorkar laipuiin faina kawnga hma a lakna chu fakawm a tih thu a sawi bawk.

Mipuite chu kan chhehvel boruak a chhiat zel lohna tur atana hmalak puiah sawmin, plastic free state siam a nihna tur kawnga thawhpuiah a sawm. Mipuite leh sorkar chu ṭha taka kan thawkdun lo a nih chuan kan duhthusam ang Nagaland chu a takah kan nei thei ngai dawn lo ni, a ti.

He programme-a telte hian plastic hmang tawh lo turin thu an tiam a, hemi hnu hian Kohima khawlaia plastic paihte chharkhawmna an nei a ni. Hetah hian Chief Minister bakah a official pawimawh tak takte pawh an tel.