Hmarchhak-ah CAB duh lohna kawngzawh huaihawt
Hmarchhak state pathum - Manipur, Meghalaya leh Nagaland-ah Ningani khan North East Forum of Indigenous People (NEFIP) hmalaknain Citizenship (Amendment) Bill 2016 duh lohna lantir a ni.
Nagaland khawpui, Kohima-ah chuan Joint Committee on Prevention of Illegal Immigrants (JCPI) huaihawtin kawng zawh a ni. Kawngzawhnaah hian tribal organisation hrang hrang, women organisation, GB association Kohima, ANCSU, law college zirlai leh midang tam tak an tel. TT Stadium Kohima pawnah hun an hman hnuin, chief minister chenna in panin kawng an zawh a, CM hnenah lehkha an thehlut nghal bawk.
CM hnena ngenna an thehluhah hian NEPI vice president Theja Therieh leh joint secretary Tia Longchar ten hming an ziak a, CM chu hmarchhak bial, a bikin Nagaland mipuite duhdan zahsak tura sorkar laipui ngen turin an ti a, hmarchhak boruak ṭha leh muanawm a awm theihna turin sawisel hlawh tak bill chu hnuhkir tir turin an ngen.
NEFIP vice president Therieh chuan hmarchhak state hrang hrangah CAB duh lohna hi lantir a ni tih sawiin, he bill hi Parliament a pass a nih a, law-a chantir a nih chuan dan loa rawn lutte chuan Nagaland-a inbengbel turin dikna an neih phah dawn a, a ram leilung fate chu chimral an ni thuai dawn a ni, a ti. Therieh chuan hmarchhak state hrang hranga chief minister-te pawh inlungrual a, CAB dodalna kawnga hma la ho turin a ngen bawk.
Manipur-a Imphal Valley-ah pawh CAB duh lohna lantirna kawngzawh neih a ni a, civil society body hrang hrang bakah, university leh college zirlaite an tel. Kawngzawh huaihawt a nih vang hian venhimna pawh khauh taka kalpui a ni a, mahse boruak duhawm lo thleng erawh a awm lo.
Manipur chief minister N Biren Singh chaun February thla khan Manipur-ah chuan BJP kaihhruai sorkar ding mah se, CAB chungchangah chuan mipuite duhdan chu an thlawp tih a sawi a, he bill a duh loh thu hi sorkar laipui lamah pawh chiang takin a lo hrilh tawh a ni.
Meghalaya khawpui, Shillong-a kawngzawh chu NEFIP general secretary Robertjune Kharjahrin chuan a telpui. Kharjahrin chuan CAB chu hmarchhak leilung fa, tribal mite nuaibo tumna pakhat nia an ngaih thu sawiin, BJP kaihhruai NDA sorkarin kaltlangpui a tum chu an dem takzet tih a sawi. Hemi chungchang hi Supreme Court-a thlen an tum bakah, United Nations-ah pawh complaint thehlut an tum tih a sawi. CAB chuan Constitution Article 14 a palzut a ni tiin, India ram, sakhaw tihbik nei lo ram a nihna chu a tidal dawn a ni, a ti.
NEFIP president Ningthouja Lancha chuan CAB duh lohna hi hmarchhakah lantir chhunzawm zel a la ni dawn tih sawi. Hmarchhak mipuite duhdan chu central lama hruaituten an hriatsak ngei a ṭul tih a sawi. CAB hi kumin January thla khan Lok Sabha-ah pass a ni a, mahse Rajya Sabha-ah pharh a ni lo. Mahse Lok Sabha inthlanpui neih dawn khan tuna rorelna changtu, BJP chuan thlan tlin an nih chuan CAB hi pass ngei a tiam a, tunah hian Parliament thlasik ṭhutkhawma putluh hman ngei tumin hma a la mek a ni.