Assam: Tualthah leh pawngsual vangin thi turin a chungthu rel

Assam-a Sivsagar district court chuan Ningani khan college zirlai pakhat pawngsual leh thah thubuaiah Bikash Das chu thi turin a chungthu a rel.

Thiam loh chang Bikash Das hi khaihlum tura tih a ni a, mahse ni 30 chhungin Gauhati High Court hnenah a 'appeal' an phalsak thung. Nikum July 10 khan Bikash leh a thurualpuite hian Assam Agricultural University, Jorhat-a zirlai Radha Kumari chu rel tlan laiah pawngsualin an that zui a, a ruang hi rel toilet-ah an hnutchhiah zui a ni. Simlaguri station-ah passenger dangten a ruang hi an hmu chauh a, police-ten an chhuizui hnuah Bikash leh Bipin Pandey-te chu mawhphurtu bera puh an nih vangin an man zui a ni.