NRC-a tel lote tan CAB hi thil ṭul tak a ni: Assam BJP Chief

Assam unit BJP chief, Ranjeet Kumar Dass chuan August 31-a tlangzarh, national register of citizens (NRC) final list-a tel lo mi nuai 19-te tan chuan Citizenship Amendment bill (CAB) pawm chu thil ṭul tak a ni tih a sawi.

Ranjeet Kumar Dass chuan CAB chu India mi tam takin an chhawr ṭangkai dawn tih sawiin, a bik takin NRC-a tel lote chu ṭangkaipui tur an nih thu a sawi a ni. BJP hian kum 1971 hma lama refugee certi­ficate pek chhuah a pawm loh avangin Bengali Hindu, Koch Rajbonshi leh Buddhist tam takte chu NRC-ah an tel lo niin an sawi bawk.

Mahatma Gandhi piancham kum 150-na lawmna peng pakhata thu a sawinaah national register of citizens-a tel lo mi tam takte chu Foreigners Tribunal hmaah inlanin an insawifiah a ngai dawn a ni. CAB pawm a nih hunah erawh chuan boruak hi a ziaawm dawn a, hemi thlir reng chung hian CAB hi thil ṭul tak a niin kan ngai, a ti.

Kumar Dass chuan an state pawhin Citizenship Amend­ment bill pawimawhna chu an hre chho zel a, hemi avang hian eptu lam pawhin an dodalna an tinep tawh a ni, a ti bawk. "CAB dodalna nasa tak karah Panchayat poll leh  Lok Sabha Poll-ah hnehna kan chang a, hei hian mi nawlpuiin CAB pawimawhna an hria tih a tilang chiang hle," a ti.