AP-a sipai nunchan zirin China a tilawm lo
Indian Army-ten Arunachal Pradesh-a mountain combat exercise, 'Him Vijay' an neih mek chuan China a tilawm lo hle nia sawi a ni. China hian Arunachal Pradesh hmun tam zawk hi a ram angah a chhal a ni.
Sipaiten nunchan an zirna hi Line of Actual Control (LAC) aṭanga km 100 vela hla a ni. Sipaite hi battle group pathumah an inṭhen a, group pakhatah sipai 4,000 zel an awm. An nunchan zirna hmun hi feet 14,000 vel zeta sang a ni a, October 25-ah an zo ang.
China president Xi Jingping-a'n India ram a rawn zin tur chungchang buaipuia kar kal taa rawn zin, China vice foreign minister Luo Zhaohui chuan Delhi-a foreign secretary Vijay Gokhale nena an inkawmnaah, Arunachal Pradesh-a sipaite nunchan zir mek chungchang pawh hi a sawichhuak a ni. President Xi hian India ramah a zin dawn tih sawi mah se, a zin hun tur tak erawh puanzar a la ni lo.