LRO-in Shillong Civil Hospital-a Bible dah bo turin phut

Meghalaya-a Legal Rights Observatory (LRO) chuan state chief secretary, health secretary leh deputy commissioner hnenah petition thehluhin, Shillong Civil Hospital-a Holy Bible dah ṭhin chu dahbo turin an ngen. 

Hemi hma hian Jaintia Students' Union chuan National Institute of Technology (NIT) gate-a Ganesha lim dah chu dahbo turin an lo phut tawh a, hei vang hian LRO chuan medical facility-ah sakhaw tih bik a awm lohna turin Civil Hospital-a Holy Bible dah pawh dahbo turin an phut ve leh a ni. 

LRO chuan an petition thehluhah, Shillong Civil Hospital-a damlote khum bulah Holy Bible dahte chu la bo vek turin sorkar an phut tih an sawi. "Damlo bula Bible dah a, Kristian ni lote hnena chhiar tura tihluih chu mimal zalenna palzutna lian tak a ni," an ti. Hei hi UN Universal Declaration of Human Rights Article 18 kalh a ni tih an sawi bawk. 

Organisation hian chief secretary hnenah Kristian missionary-ten hospital an tlawh pawh khap turin an phut bawk. An thil phut hi state sorkarin a ngai pawimawh lo a nih chuan union health ministry lamah zualko an tum thu an sawi.