Assam CM-in army official-te a kawm

Assam chief minister Sarbananda Sonowal chuan kar kal ta Inrinni khan Dibrugarh district-a Dinjan Military Station a tlawh a, army official-te chu state security dinhmunte a sawipui. 

3 Corps GOC Lt Gen Rajeev Sirohi chuan  upper leh south Assam-a security dinhmun chu sipaiten ngun taka an thlithlai reng thu sawiin, police leh intelligence agency-te pawhin an puih thu CM hi a lo hrilh a ni. 

Assam ramri bul, Arunachal Pradesh-a Tirap leh Changlang district-a hmun kilkhawr zawkahte venhimna khauh zawka kalpui a nih avangin helpawlte chetvelna pawh khuahkhirh a nih thu Lt Gen Sirohi chuan a sawi. Hei bakah hian sipaiten beihpui an thlakna aṭanga helpawl ralthuam an mansak chungchangte pawh kimchang takin alo hrilh bawk. 

2 Mountain Division GOC Maj Gen Rajendra Sachdev chuan Chief Minister hnenah hian an division-in tuilian venna tura Dinjan Cantonment leh a chhehvel thingtlang khuaa an hmalak dan hrang hrangte a  hrilh bawk a ni. Water Resources Department puihnain Detailed Project Report pawh an siam mek tih a sawi.