Arunachal Pradesh Sipai exercise leh Xi Jinping lo zin turin inzawmna a nei lo: India

India defence official-te chuan Arunachal Pradesh-a India sipai exercise neih mek 'Him-Vijay' chu China president Xi Jinping lo zin tur nen inzawmna a nei lo tih an sawi.

Indian Army-a Corps thar 17-te chuan Arunachal-ah hian exercise an nei mek a, hei hi China chuan an duh lo hle tih report a awm a ni. Xi Jingpin leh  prime minister Narendra Modi-ten summit an neih dawn hnaia Arunachal-a military exercise neih hi China chuan a duh lo hle nia sawi a ni a, mahse Defence lam chuan Jinping lo zin tur leh military exercise an neih mek chuan inzawmna engmah a nei lo tih an sawi. Thlasik dawnah leh thlasik zawhah hetiang exercise hi an nei ṭhin tih an sawi bawk.

India sipaiten exercise an neihna hmun hi ft. 14,000 vel zeta sangah a ni a, sipai 4000 velin exercise hi neiin October 25 thleng an nei ang. China chuan Arunachal Pradesh hmun ṭhenkhat hi a ram chhungah chhalin, India nen ramri chungchangah hian vawi tam tak an inhmu thiam lo tawh. Hemi chungchangah hian ṭum 20 chuang zet inbiakna an nei tawh bawk. Jinping hian kar leh hian India rawn tlawh a tum a, Modi nen a ṭumhnihna atan meeting an  nei dawn a ni.