Youth Congress-in LPG man tihsan duh lohna lantir

20th February, 2020

Indian Youth Congress (IYC), Manipur chuan Thawhlehni khan Imphal-ah LPG man tihsan duh lohna lantirin kawng an zawh.

LPG cylinder, kg 14.2-a rit hi Manipur-ah hian bur khat Rs 714 aṭangin Rs 858.50-ah tihsan a ni.

Imphal-a IYC kawngzawh hi Mahila Congress-ten an zawm bawk. Kawng zawh zinga ṭhenkhat chuan LPG cylinder man tihsan duh lohna thuziakte kengin, cylinder ruakte an keng tel bawk.

IYC chuan prime minister Narendra Modi leh a kaihhruai BJP sorkar laka lungawi lohna thute aupuiin, LPG man tihsanna chu sut leh nghal turin an phut thu an sawi.