Tripura CM-in Army School dah a phut

Tripura chief minister Biplab Kumar Deb chuan Thawhlehni khan union defence minister Rajnath Singh chu Delhi-ah a hmu a, Tripura-a Army School thar dah turin a phut. 

Meeting-ah hian CM Deb chuan an state mamawh hrang hrangte union minister hi a sawipui a, heng zingah hian West Tripura district-a Mohanpur sub-division-a Army School thar din tura a phutna pawh a tel a ni. 

Deb chuan Tripura-a Army recruitment kalpui turin a ngen bawk a, heng a ngenna pahnihte hi union minister chuan a pawm thu hrilhin, a rang thei anga hma lak nghal a nih tur thu a sawi. 

CM chuan union minister-in a ngenna a lo pawmsak chu lawmawm a tih thu sawiin, a twitter-ah Tripura mipuite aiawhin lawmthu a hrilh. Army School din tur leh Army recruitment neih tur chu state mipuite tan a ṭangkai dawn hle tih a sawi a ni.