AR-ten Manipur-a Indo-Myanmar ramri ven loh lai tiphui

Assam Rifles (AR) chuan Manipur-a Moreh khuaa dan leh thupek chak zawka ken­kawh a nih theihna turin Indo-Myanmar ramri ven loh lai an tiphui tih police-ten an sawi. 

Manipur Tengnoupal dis­trict-a Moreh khuaa Myanmar leh India inrinaah hian km 10 vel lai chu ven loh a awm a, helai hmun hi Thawhlehni khan Assam Rifles-te chuan an tiphui a ni. Thawhṭanni khan Moreh khaw bula Subsidiary Inte­lligence Bureau (SIB) office-ah bomb a puak a, Inrinni zanah pawh khan Moreh police station bulah bomb a puak bawk. Thi leh hliam an awm erawh report awm lo mah se dan leh thupek khauh zawka kenkawh a nih theihna turin ramri ven loh lai hi AR-te hian an khar ta a ni. AR-te hi paramilitary force upa ber niin, India leh Myanmar inrina venna kawngah leh dan leh thupek kenkawhna kawngahte pawh mawh an phur. 

Tengnoupal district Supe­rintendent of Police, Th Vik­ramjit Singh chuan border gate pahnih- gate number one leh gate number two-te chu an hawng thung tih a sawi.