RSS nena inzawm LRO-in Meghalaya-ah Christianity dodal zawngin hma la
RSS nena inzawmna nei Legal Rights Observatory (LRO) chuan Meghalaya-ah Christianity dodal zawngin campaign an kalpui.
LRO kaihruaitu ber hi RSS worker hlui Vinay Joshi a ni a, ni nga liam ta chhung vel khan LRO hian Meghalaya-a kohhrante leh Kristian awmte dodal zawngin kawng hrang hrangin hma an la nia tarlan a ni. Nilaini pawh khan Mawphlang CHC, East Khasi Hills district-a Bible chang tarlante chu LRO hian a rang thei ang bera tibo turin an phut a, health centre-a Bible dahte pawh dahbo turin an lo ti tawh bawk.
RSS-in a thlawp LRO hian Meghalaya Chief Secretary, Health Secretary leh District Deputy Commissioner-te pawh hemi chungchangah hian email-te an thawn nia tarlan a ni. Meghalaya sorkar hnena email an thawnah chuan, "Meghalaya state ang, mipui cheng 25% dawn Kristian an nih lohnaah hian sorkara nasa taka Christianization kalpui hi a hlauhawm a ni," tiin an ziak.
LRO hian engvangin nge Meghalaya Kristiante lakah dodalna a lantir thut hi hriat a la ni lo. Jaintia Students Union-ten NIT Meghalaya thuneitute hnena an administrative building aṭanga Ganesh idol dahbo tura an tih vang a nih rin a ni thung.
LRO hian sorkar health facility-te chu Kristian sakhaw hmunahte a chang zo tawh tih sawiin, Bible chang, Bible copy leh Isua Krista lem tam tak heng hmunah hian hmuh tur a awm a ni, an ti. A hmain state sorkar hnenah Shillong Civil Hospital-a Holy Bible dahte pawh dahbo turin an lo phut a, Kristian missionary-ten damdawi-ina damlo an tlawh ṭhin pawh khap turin an lo ti tawh bawk.